Is-Servizz tal-Youth
in Focus jipprovdi għajnuna professjonali lil żgħażagħ minn 13 sa 18-il sena,
bl-iskop li jassistihom fiż-żmien tal-adoloxxenza u ż-żgħożija tagħhom.
Iż-żgħażagħ jiġu megħjuna sabiex jidentifikaw il-bżonnijiet tagħhom filwaqt li
jindirizzawhom bis-sehem attiv tagħhom u bl-għajnuna tal-professjonisti
tas-servizz. Permezz ta’ dawn l-interventi, ngħinu liż-żgħażagħ jirrikonoxxu u
jimmassimizzaw il-potenzjal tagħhom. B’hekk nixprunaw parteċipazzjoni attiva
anke fejn jidħol il-pjan ta’ azzjoni li jkun qed jiġi mfassal bl-għan li
nindirizzaw il-bżonnijiet attwali jew futuri taż-żgħażagħ partikolari. Dan
is-servizz jingħata lil żgħażagħ li jkunu għaddejjin minn sfidi varji li
jinkludu fost l-oħrajn rabja, problemi ta’ relazzjoni mal-ġenituri, użu jew
abbuż ta’ droga u/jew alkoħol, imġiba kriminali u abbuż emozzjonali.
